Tema 3: A reprodución
1.1-As etapas da vida.:
A longo da nosa vida, as persoas atravesamos tres etapas: a infancia, a adolescencia e a idade adulta.
A infancia desde o nacemento ata os 12 anos de idade, aproximadamente. Crecemos moi rapidamente e adquirimos múltiples habilidades, como camiñar, falar e ler, ( habilidades motoras, cognitivas,..máis autónomos).
A adolescencia desde os 12 ata os 19 anos de idade, aproximadamente.
-A puberdade entre os 11 e os 15 anos, etapa na que os aparatos reprodutores de rapaces e rapazas alcanzan a súa madurez e capacidade fértil. Aparición de diferenzas físicas claras entre os rapaces e as rapazas.
A idade adulta, desde os 19 anos ata a fin da vida, e divídese en tres etapas: a xuventude, a madurez e a ancianidade.
1.2.-Os caracteres sexuais
Diferencian os homes e as mulleres, poden ser de dous tipos:
Caracteres sexuais primarios: son os órganos reprodutores feminino e masculino.Permiten diferenciar se un bebé acabado de nacer é unha nena ou un neno.
Caracteres sexuais secundarios: son diferenzas físicas entre os homes e as mulleres que se fan máis evidentes durante a puberdade. Nesta etapa, o corpo experimenta unha serie de cambios, como a aparición de peluxe na pube e nas axilas. Ademais, prodúcense cambios específicos en cada sexo:
Nos rapaces, a voz vólvese máis grave, anchean os ombros, a noz faise máis evidente e comeza a crecer o bigote e a barba.
Nas rapazas, desenvólvense as mamas e as súas cadeiras van ancheando.
2.-Os óganos reproductores: masculino e feminino
O aparato reprodutor masculino está formado polos seguintes órganos: os testículos, os condutos deferentes, as vesículas seminais, a uretra e o pene.
O aparato reprodutor feminino está formado polos seguintes órganos: os ovarios, as trompas de Falopio, o útero, a vaxina e a vulva.
Curiosidade:
O símbolo masculino representa o Deus Marte, Deus da guerra na mitoloxía romana. O símbolo representa o escudo e a lanza que usaban os homes cando saían a cazar.
O símbolo feminino representa a deusa Venus, deusa do amor, a beleza e a fertilidade na mitoloxía romana. O símbolo está formado por un círculo unido a unha cruz e representa a deusa cun espello na man.
3.-As células sexuais e a fecundación
Os seres humanos realizamos as tres funcións vitais: a de nutrición, a de relación e a función de reprodución.
Coa función de reprodución, orixinamos outros seres semellantes a nós (= continuidade da nosa especie). Temos un tipo de reprodución sexual; é necesario que se produza a unión de dúas células sexuais, unha feminina e outra masculina, é dicir, un óvulo e un espermatozoide. Este momento da reprodución recibe o nome de fecundación.
3.1.-As células sexuais:
O aparato reprodutor masculino produce espermatozoides, e o aparato reprodutor feminino produce óvulos. Estas dúas células sexuais son moi diferentes.
-Os espermatozoides: son as células reprodutoras masculinas. Tamén reciben o nome de gametos masculinos.
O seu tamaño é moi pequeno e ten tres partes: a cabeza, o pescozo e a cola ou flaxelo. Grazas ao seu flaxelo estas células poden moverse. Os espermatozoides comezan a formarse nos testículos durante a puberdade.
-Os óvulos son as células reprodutoras femininas. Tamén se chaman gametos femininos.
Teñen forma arredondada, o seu tamaño é moito maior ca o dos espermatozoides e non teñen capacidade de moverse.
No momento do nacemento, as nenas teñen no seu aparato reprodutor un gran número de óvulos inmaturos.
Estas células madurarán na puberdade (estarán preparadas para ser fecundadas).
3.2.- A fecundación: é a unión dun óvulo e un espermatozoide nunha das trompas de Falopio (cada 28 días, aproximadamente, un ovario libera un óvulo, é arrastrado a través das trompas de Falopio cara ao útero). Se durante ese percorrido o óvulo se encontra cun espermatozoide, pode ser fecundado. A fecundación prodúcese cando o espermatozoide alcanza o óvulo e consegue entrar nel.
A partir dese momento, o óvulo fecundado ou cigoto comeza a dividirse e recibe o nome de embrión. Cando o embrión chega ao útero, fíxase nas súas paredes, é dicir, implántase, e segue crecendo.
Video: A odisea da vida e vídeo curto: A vida en 9 meses
4.-O embarazo e o parto: O embarazo dura aproximadamente nove meses e termina co parto. Durante este tempo prodúcense moitos cambios, tanto no embrión como no corpo da muller.
-A formación da placenta:
Durante as primeiras fases do desenvolvemento do embrión créase un tecido na parede do útero onde se produciu a implantación. Este tecido, que se chama placenta, encárgase de captar o osíxeno e os nutrientes do sangue da nai. O cordón umbilical une a placenta co bebé e a través del viaxan os nutrientes e o osíxeno que capta a placenta.
Tamén se forma a bolsa amniótica. No seu interior está o líquido amniótico, que rodea e protexe o embrión.
-Do embrión ao feto:
Durante os nove meses que dura o embarazo, o embrión evoluciona e prepárase para o momento do nacemento. Os cambios máis importantes que ocorren durante este período son:
Primeiro trimestre. Durante os dous primeiros meses, aproximadamente, o cerebro do futuro bebé comeza a desenvolverse, o seu corazón latexa e aparecen uns pequenos vultos que, co tempo, serán os seus brazos e as súas pernas. Ao final do primeiro trimestre o embrión recibe o nome de feto. Nese momento ten xa formados os órganos, que comezan a funcionar, a excepción dos pulmóns, que se estrearán no parto.
Segundo trimestre. Neste período o feto xa pode oír, chupa o dedo, abre e cerra os ollos, e a súa nai comeza a sentir como se move.
Terceiro trimestre. nos últimos meses, o feto crece e gaña peso,no 8 mes xa entre dous quilos e medio e tres quilos. Os seus órganos maduraron, polo que está listo para poder vivir fóra do ventre materno. Os bebés que nacen antes dese momento considéranse prematuros e, xeralmente, necesitan coidados especiais despois do parto.
O parto: é o momento do nacemento do bebé e desenvólvese en tres etapas: a dilatación, a expulsión e o libramento.
Durante a dilatación, a zona do útero que se une á vaxina dilátase pouco a pouco ata alcanzar un diámetro duns 10 centímetros. Ademais, prodúcense contraccións rítmicas que empuxan o feto cara á vaxina.
A fase da expulsión consiste na saída do feto ao exterior a través da vaxina. (córtase o cordón umbilical). Despois duns segundos, o bebé inspira aire por primeira vez e chora.
O libramento é a última fase do parto. Nela prodúcese a saída da placenta ao exterior.
